[غير معروف]

السلام عليكم ورحمة الله وبركاته
هذه القصيدة بمناسبة فوز ابن العم عجلان بن عبدالعزيز العجلان (بالمركز الاول) في انتخابات الغرفة التجارية الصناعية بالرياض وبفارق كبير ولله الحمد .

الأول الأول يمال الغنيمه
هذا مكانك يارفيع المقامي

نخوه وسطوه واقتدار وعزيمه
شهودها صيتٍ يهز الانامي

صيتٍ يبن عمي رقى فوق غيمه
علاّه فعلك يابعيد المرامي

القصد سامي والنوايا سليمه
والا الهدف ما له سواك أنت رامي

ياشامخٍ ما يلتفت للنميمه
ياالمرجله ياالمفخره ياالتسامي

ياالحر الأشقر يااليمين الكريمه
يامن على هام النواميس حامي

أعرفك من هاك الليال القديمه
عينك على الصف الرفيع الأمامي

والصوت ما له ياأبيض الوجه قيمه
إلا لمثلك ياالفريد القطامي

حنّا نصوّت للغلا والحشيمه
عجلان لو تكثر علينا الاسامي

الحر يكفخ والهليمه هليمه
والذرب يشرب والظوامي ظوامي

خل الحسود اللي نجاحك يضيمه
لعل عينه ما تذوق المنامي

وخل النفوس الحاقدات اللئيمه
تاكل بعضها لحمها والعظامي

الصمت في بعض المواقف هضيمه
والفعل يبطل شايعات الكلامي

والعاقبه من فضل ربي وخيمه
تبت يدين مروجين التهامي

تبقى السقيمه يبن عمي سقيمه
هذا أنت فزت بعاليات السنامي

يبو سعد فعل ابن آدم غريمه
إما ربح وإلا رجع بانهزامي

وأنا خصيم اللي ضميره خصيمه
وعلى الردي ماني كثير الملامي

مبروك ما هلت هماليل ديمه
مبروك ياالشهم الكريم الهمامي

للإستماع إلى القصيدة
http://e.top4top.net/m_15496b41.mp3

[الكاتب]

المشاركات